करडेतील पिस्तूलातून जीवघेणा गोळीबार; तांत्रिक तपास, सीसीटीव्ही आणि गुप्त माहितीच्या आधारे शिरूर पोलिसांची धडाकेबाज कारवाई

शिरूर | जागृत शोध ( भगवान श्रीमंदिलकर ) -

               शिरूर तालुक्यातील करडे गावात पिस्तूलातून गोळीबार करून खुनाचा प्रयत्न करणाऱ्या सराईत गुन्हेगारांच्या टोळीला अवघ्या ७२ तासांच्या आत जेरबंद करून शिरूर पोलिसांनी गुन्हेगारांना कायद्याचा धाक अजूनही कायम असल्याचे दाखवून दिले आहे. तांत्रिक तपास, सीसीटीव्ही फुटेज, गुप्त माहिती आणि अचूक नियोजनाच्या जोरावर पोलिसांनी परजिल्ह्यात सापळा रचत पाच आरोपींना अटक केली. या धडाकेबाज कारवाईमुळे गुन्हेगारी प्रवृत्तीला मोठा हादरा बसला असून, शिरूर पोलिसांच्या कार्यक्षमतेचे सर्वत्र कौतुक होत आहे.

              दिनांक १८ जुलै २०२६ रोजी मध्यरात्री करडे गावातील हनुमान मंदिराजवळ जुन्या वादातून आरोपींनी फिर्यादीवर पिस्तूलातून सलग गोळीबार करून त्याचा खून करण्याचा प्रयत्न केला. या प्रकरणी फिर्यादीच्या तक्रारीवरून शिरूर पोलीस ठाण्यात भारतीय न्याय संहिता २०२३ तसेच शस्त्र अधिनियमातील विविध कलमांनुसार गंभीर गुन्हा दाखल करण्यात आला. 

              घटनेचे गांभीर्य लक्षात घेऊन पोलीस निरीक्षक विनोद पाटील यांनी तातडीने स्वतंत्र तपास पथके तयार केली. आरोपींच्या हालचालींवर तांत्रिक पद्धतीने लक्ष ठेवण्यात आले. सीसीटीव्ही फुटेजची तपासणी, मोबाईल लोकेशनचे विश्लेषण आणि गुप्त बातमीदारांकडून मिळालेल्या माहितीच्या आधारे आरोपी परजिल्ह्यात येणार असल्याची माहिती मिळताच पोलिसांनी अचूक सापळा रचून पाच आरोपींना ताब्यात घेतले. या गुन्ह्यात दोन विधीसंघर्षित बालकांचाही सहभाग असल्याचे तपासात निष्पन्न झाले आहे. 

            पोलिस तपासात अटक करण्यात आलेल्या प्रमुख आरोपींवर यापूर्वीही खंडणी, अवैध शस्त्र बाळगणे, मारहाण आणि इतर गंभीर स्वरूपाचे गुन्हे दाखल असल्याची माहिती समोर आली आहे. तसेच फिर्यादीवरही पूर्वी गंभीर गुन्हे नोंद असल्याचे तपासात स्पष्ट झाले असून, जुन्या वैमनस्यातूनच हा जीवघेणा हल्ला झाल्याचा प्राथमिक निष्कर्ष पोलिसांनी नोंदविला आहे. या प्रकरणाचा पुढील तपास सुरू असून, शस्त्राचा उगम आणि इतर आरोपींच्या भूमिकेचाही शोध घेतला जात आहे. 

या संपूर्ण कारवाईत पोलीस अधीक्षकांच्या मार्गदर्शनाखाली पोलीस निरीक्षक विनोद पाटील, पोलीस उपनिरीक्षक शुभम चव्हाण तसेच शिरूर पोलीस ठाण्याच्या तपास पथकाने महत्त्वपूर्ण भूमिका बजावली. अवघ्या ७२ तासांत आरोपींना अटक करून शिरूर पोलिसांनी गुन्हेगारांना कायद्याचा धाक दाखवत नागरिकांच्या सुरक्षिततेचा विश्वास अधिक दृढ केला आहे. 

जागृत शोध विशेष :

गोळीबार करून दहशत निर्माण करण्याचा प्रयत्न करणाऱ्यांना शिरूर पोलिसांनी वेळेत बेड्या ठोकत स्पष्ट संदेश दिला आहे—गुन्हा कितीही गंभीर असला, तरी कायद्याच्या कचाट्यातून सुटका नाही!